Муддатли ҳарбий хизматчилар учун армияда ўтган ҳар бир кун ўқиб-ўрганиш, чиниқиш, машғулотларда тобланиш нуқтаи назаридан фойдали кечади. Буни мудофаа вазирлигига қарашли Бухоро вилояти Қоракўл туманидаги ҳарбий қисмда йигитлик бурчини ўтаётган аскарлар яхши билишади.

— Айниқса, январь ойи аскарлар учун эсда қоларли бўлмоқда, — дейди қисм маданият маркази бошлиғи, сержант Алижон Қўчқоров. — Ўзбекистон Қуролли Кучлари ташкил топганининг 32 йиллиги муносабати билан бир қатор маданий-маърифий тадбирлар ўтказиляпти. Ана шундай тадбирлардан бири видеомулоқот тарзида ташкил этилди. Унда Қорақалпоғистон Республикаси Тахиатош туманида жойлашган ҳарбий қисмда хизмат бурчини ўтаётган аскарларнинг ота-оналари иштирок этишди. Видеомулоқотда Асадбек Жўраев, Фозилбек Усмонов, Бобирмирзо Тўхтаев сингари аскар йигитлар сўз олиб, армия ҳаёти, бу ердаги шарт-шароитлар ҳақида сўзлаб бердилар, эл-юрт ишончини оқлаш учун сидқидилдан хизмат қилаётганликларини айтиб, ота-оналарини хурсанд қилдилар.

Айтиш керакки, юртимиздаги барча ҳарбий қисмларда бўлгани каби ушбу масканда ҳам 14 январь — Ватан ҳимоячилари куни байрами кўтаринки кайфиятда қарши олинмоқда. Куни кеча бу ерда Қоракўл, Олот ва Жондор туманларидан таклиф этилган ўғил-қизлар ўртасида спортнинг шахмат, шашка, камондан ўқ отиш, минифутбол, кураш турлари бўйича ҳарбий қисм командири кубоги учун мусобақалар ҳам ташкил этилди. Ғолиблар эсдалик совғалари билан тақдирландилар.

Истам ИБРОҲИМОВ, “Халқ сўзи”.