«RBC» нашрининг «The Lancet» журналига таяниб ёзишича, дунё бўйича юқори ҳарорат сабаб ҳар йили тахминан 550 минг киши вафот этади.

«Бу дегани — йил давомида ҳар дақиқа юқори ҳарорат билан боғлиқ камида битта ўлим содир бўлади. Бу ҳақиқатан ҳам даҳшатли рақам», — деди Сидней университети профессори ва ҳисобот ҳаммуаллифларидан бири Олли Жей.

Тадқиқотда қайд этилишича, 1990 йиллардан буён иссиқлик сабаб ўлим ҳолатлари аҳолига нисбатан 20 фоизга кўпайган.

Олли Жейнинг сўзларига кўра, олимлар айрим минтақалар инсон организми чидаб бўлмайдиган физиологик чегара нуқтасига яқинлашаётганидан хавотирда. Бу шароитда одамлар иссиқлик ва намликнинг юқори даражасида яшаб қололмаслиги мумкин.

Ўлим ҳолатлари сони янги баҳолаш методлари ва ўлим статистикасига кенгроқ кириш имконияти туфайли аниқроқ ҳисоблаб чиқилган.

Тадқиқот муаллифлари шунингдек таъкидлашича, дунёдаги барча аномал иссиқлик тўлқинлари иқлим ўзгариши билан боғлиқ. Ҳароратнинг ошиши нафақат инсон саломатлигига, балки иқтисодиётга ҳам салбий таъсир кўрсатмоқда: 2024 йилда жазирама туфайли меҳнат унумдорлигининг пасайиши натижасида дунё иқтисодиёти 1 триллион доллар даромаддан айрилган.