Истам ИБРОҲИМОВ/«Халқ сўзи». Қоракўл туманида масъулияти чекланган жамият шаклида фаолият юритаётган «JV YINONG SEED TECHOLOGY» Ўзбекистон – Хитой қўшма корхонаси мутахассислари бу саволга «Албатта, мумкин», дея жавоб бермоқда.

Асосан қишлоқ хўжалигига инновацион технологияларни қўллаган ҳолда селекция ишлари олиб боришга ихтисослашган мазкур корхона ўтган йилнинг кеч кузида 60 гектар майдонда тажриба – синов тариқасида Хитойдан келтирилган «GLUTEN-1» навли буғдой эккан ва экин томчилатиб суғориш технологияси асосида парвариш қилинган эди. Масъулияти чекланган жамияти раҳбари И. Шукруллаевнинг билдиришича, бу майдонлар шўрхок ерлардан иборат. Уларнинг ўзлаштирилганига кўп вақт бўлмаган. Шунга қарамай, буғдойдан мўл ҳосил олинди. Ҳосилдорлик гектарига ўртача 106 центнерни ташкил этди. Яна бир жиҳати, дони сифатли. У импорт буғдой ўрнини боса олади. Бунинг устига эртапишар. Ғаллани ўриб-йиғиб олгач, такрорий экин сифатида пахта ҳам экиш мумкин.

Тажриба ўзини оқлаганига ишонч ҳосил қилинди. Яқин кунлар ичида Қоракўл ва Олот туманларидаги жами 800 гектар ерда «GLUTEN-1» навли буғдой уруғи экилади.