Фото: Getty Images

Financial Times нашри дунё бўйлаб жойлашган пляжлар эрозия (тупроқнинг ер усти сувлари оқими таъсирида емирилиши) туфайли йўқолиб кетиши мумкинлигини маълум қилди. Бунда асосий муаммо — соҳиллардан қумнинг ювилиб кетиши ва бу жараённи тўхтатишнинг қийинлиги саналади.

«Майами, Барселона ва Австралиянинг Олтин соҳилидан тортиб, бутун дунё бўйлаб маҳаллий ҳукуматлар келгуси йилларда соҳилларни ер емирилишидан қандай ҳимоя қилиш мумкинлигини ўрганмоқда», — деб ёзади Financial Times.

Нашр таъкидлашича, соҳил эрозиясининг маълум қисми табиий жараён ҳисобланади. Аммо глобал исиш туфайли юзага келган музликларнинг эриши, кучли бўронлар ва баланд тўлқинлар бу ҳолатни янада оғирлаштирмоқда.

Пляжларни сақлаб қолиш учун сунъий равишда қум олиб келиш амалиёти кенг тарқалган. Қум табиий тўсиқ вазифасини бажариб, сув тошқинларидан ҳимоя қилиб туради. Аммо сўнгги йилларда қурилиш ва бошқа соҳаларда талаб юқори бўлгани боис қум нархи ошиб бормоқда, унинг таклиф ҳажми эса камайган.

Маълумотларга кўра, 2020 йилдан бери АҚШнинг Родант шаҳрида соҳил эрозияси туфайли 11 та уй океанга ағдарилган. Пляжларни тиклаш учун 40 миллион доллардан зиёд маблағ керак бўлиши айтилмоқда.

Барселона соҳили эса ҳар йили тахминан 30 минг кубометр қумни йўқотмоқда. Бу миқдор 12 та олимпия бассейни ҳажмига тенг.

Financial Times таҳлилчиларига кўра, кўрилаётган чораларга қарамасдан, айрим пляжлар келажакда мутлақо йўқолиб кетиши мумкин.