Европа Иттифоқи ички ёнув двигателли транспорт воситаларини бутунлай тақиқлаш режасидан воз кечди. Бу ҳақида BILD нашри хабар берди.

Унда айтилишича, Брюсселда ўтказилган музокаралардан сўнг, 2035 йилга келиб CО₂ чиқиндиларини 100 фоиз камайтириш талабини бекор қилишга қарор қилинган. Бунинг ўрнига, автомобиль ишлаб чиқарувчи компанияларга CО₂ чиқиндиларини 90 фоизгача камайтириш имкониятини берувчи қурилмалар билан жиҳозлаш мақсадга мувофиқлиги таъкидланган.

Бундан келиб чиқадики, бензин ва дизель транспорт воситалари чекланган миқдорда бўлса ҳам, Европа Иттифоқи бозорига киришда давом этишлари мумкин бўлади.

Шунингдек, Европа халқ партияси раҳбари Манфред Вебер 2040 йилдан кейин ҳам Европа Иттифоқида янги ички ёнув двигателли транспорт воситаларини ишлаб чиқариш бутунлай тақиқланмаслигини тасдиқлаган.

Wэбернинг сўзларига кўра, ушбу қарор Германияда ҳозирда ишлаб чиқарилаётган барча двигатель турларини ишлаб чиқаришни давом эттиришга имкон беради. 2035 йилдан кейин ҳам янги, ҳам ишлатилган ички ёнув двигателли транспорт воситаларини сотиб олиш мумкин бўлади.

Сўнгги маълумотларга кўра, Германия фуқароларининг 63 фоизи бензин ва дизель двигателли янги автомобилларга 2035 йилдан кейин ҳам рухсат берилиши керак деб ҳисоблайди.