Туркия президенти Режеп Таййип Эрдоғаннинг айтишича, Исроил Ғазо секторида истиқомат қилувчи аҳолига гуманитар ёрдам етказилишига ҳамда ҳудудни қайта тиклаш жараёнига ўтилишига ҳар томонлама монелик қилмоқда.

Ислом ҳамкорлик ташкилоти доирасидаги Иқтисодий ва савдо ҳамкорлиги бўйича доимий қўмита йиғилишида сўзлаган Эрдоған Ғазо аҳолисига гуманитар ёрдам кўламини ошириш зарурлигини қайд этди.

— Исроилда биз сулҳ имзоланганидан буён турли баҳоналар билан 200 дан ортиқ бегуноҳ инсонни ўлдирган, босқинчи сиёсатини давом эттираётган маъмуриятга дуч келмоқдамиз. Бу ҳужумлар тинчликка қарши қаратилган. Бироқ Исроилнинг бундай ҳаракатлари бизнинг Фаластин муаммосига адолатли ва узоқ муддатли ечим топиш йўлидаги интилишларимизни ҳеч қачон тўхтата олмайди. Айни дамда биз Ғазо аҳолисига гуманитар ёрдамни кўпайтиришимиз, сўнгра эса тиклаш ишларини бошлашимиз зарур. Исроил ҳукумати бунга тўсқинлик қилиш учун барча чораларни кўрмоқда, — деди у.

Эрдоған Ғазони тиклаш режаси зудлик билан амалга оширилиши кераклигини урғулади.

— Ишончим комилки, вақт ўтиши билан биз янада қатъият билан ҳаракат қиламиз. Шунингдек, сулҳни ўрнатиш масаласида фаол позиция намоён этган АҚШ президенти Дональд Трампга чин дилдан миннатдорлик билдираман. ҲАМАС ҳаракати келишувга риоя қилишга қатъий бел боғлаганга ўхшайди. Аммо ҳаммамизга маълумки, Исроил бу борада жуда ёмон обрўга эга, — дея давом этди Туркия раҳбари.

Туркия президенти қўшимча қилиб, араб ва мусулмон давлатлари «Иордан дарёсининг Ғарбий соҳилини аннексия қилишга ҳам, Қуддус мақомини ўзгартиришга ҳам» йўл қўймаслигини таъкидлади.