Олий Мажлис Қонунчилик палатасида навбатдаги “Ҳукумат соати” бўлиб ўтмоқда. 

Унда депутатлар “Фуқаролар ва тадбиркорларга давлат хизматларини кўрсатиш, ортиқча бюрократик тўсиқларни бартараф этиш ҳамда давлат хизматларини кўрсатиш даражасини янада такомиллаштириш борасида олиб борилаётган ишлар тўғрисида”ги масалани муҳокама қилмоқда. Кун тартибидаги масала юзасидан депутатларнинг саволларига Адлия вазири Р. Давлетов жавоб беряпти.

Р. Давлетовнинг таъкидлашича, мамлакатимизда фуқаролар ва тадбиркорларга давлат хизматлари кўрсатиш тизими босқичма-босқич ислоҳ қилиниб, қулай инвестициявий ва ишбилармонлик муҳитини яратиш, ортиқча бюрократик тўсиқларни бартараф этиш ҳамда давлат хизматлари кўрсатиш сифатини тубдан яхшилашга қаратилган изчил ислоҳотлар амалга оширилмоқда. 

Хусусан, тўрт йил давомида давлат хизматлари марказлари орқали кўрсатилаётган хизмат турлари 4,5 бараварга ортган ҳолда, 37 тадан 175 тага етди ва аҳолига 40 миллиондан ортиқ хизмат кўрсатилди.

Республика бўйича 170 та замонавий Давлат хизматлари марказлари бинолари давлат-хусусий шериклик асосида қурилиб, фойдаланишга топширилди. Туман (шаҳар) марказларидан 50-100 км узоқ ҳудудларда 141 та филиаллар ташкил этилди. Бунинг натижасида ҳар куни ўртача 40-45 минг фуқароларимиз давлат хизматлари марказларига ташриф буюриб, тегишли хизматлардан фойдаланмоқда.