Бугун, 22 декабрь куни Туркия Суперлигасининг 17-тур учрашувлари старт олди. Кун доирасидаги баҳсда Истанбул Башакшеҳир ўз майдонида Газиантеп жамоасини қабул қилди. Учрашув мезбонларнинг 5:1 ҳисобидаги ишончли ғалабаси билан якунланди.

Баҳсда ҳисоб 21-дақиқада Элдор Шомуродов томонидан очилди. Орадан беш дақиқа ўтиб, Дрисса Камара ҳисобни тенглаштирди. 29-дақиқада эса Аббосбек Файзуллаев аниқ зарба билан «Башакшеҳир»ни яна олдинга олиб чиқди — 2:1.

Қайд этиш жоиз, сўнгги пайтларда Файзуллаевнинг ўйини турк футбол жамоатчилиги орасида турли танқидларга сабаб бўлаётган эди. Ўзбекистон миллий терма жамоаси аъзоси ушбу голи орқали майдонда танқидларга муносиб жавоб қайтарди. Биринчи бўлим айнан шу ҳисобда якунланди.

Иккинчи таймнинг 53-дақиқасида Арда Қизилдағ ўз дарвозасига тўп киритиб қўйди ва ҳисоб 3:1 кўринишига келди. 68-дақиқада Элдор Шомуродовнинг аниқ узатмасидан кейин Умут Гунеш «Башакшеҳир»нинг тўртинчи голини муаллифи бўлди. 84-дақиқада эса Иван Брнич мезбонларнинг бешинчи голини киритиб, учрашувга якун ясади — 5:1.

Учрашувдан сўнг «Sofascore» таҳлилий портали Элдор Шомуродовнинг ўйинини 7,9 баллга, Аббосбек Файзуллаевнинг ҳаракатларини эса 9,3 баллга баҳолади. Бу кўрсаткичлар ўзбекистонлик футболчиларнинг майдондаги самарали ўйинини яққол тасдиқлади.