Балиқчи туманида «Tetratex» МЧЖ томонидан замонавий текстиль комплекси барпо этилмоқда. Умумий қиймати 93,5 миллион евродан зиёд бўлган ушбу йирик саноат мажмуаси тўрт босқичда амалга оширилиб, ҳудуднинг иқтисодий қиёфасини тубдан ўзгартириши, янги иш ўринларини яратишда муҳим омилга айланиши кутиляпти.

— Комплекс тўлиқ эксплуатацияга топширилгандан сўнг 6 минг 650 нафарга яқин аҳоли доимий иш ўринлари билан таъминланади, — дейди туман ҳокимлиги масъул ходими Музаффаржон Каримов. — Лойиҳанинг амалга оширилиши вилоятда саноат кооперациясини янада кенгайтириб, экспортбоп маҳсулотлар ишлаб чиқариш ҳажмини оширади, янги ишлаб чиқариш занжирларини шакллантиради.

Янги мажмуа барпо этилиши туман ижтимоий инфратузилмасини ҳам кенгайтиришни талаб этади. Бу эса қўшимча хизмат кўрсатиш объектлари, логистика марказлари, транспорт инфратузилмаси ва бошқа тармоқларни ривожлантириш учун янги имкониятлар яратади. Мутахассисларнинг таъкидлашича, лойиҳа тўлиқ амалга оширилгандан кейин ҳудудга тўғридан-тўғри инвестициялар оқими ортиб, Балиқчи тумани минтақанинг йирик саноат марказларидан бирига айланиши мумкин.

Саминжон ҲУСАНОВ, «Халқ сўзи».