Фото: Президент матбуот хизмати

Жиззах вилоятида инфратузилмани яхшилаш ва тадбиркорликни ривожлантириш учун келаси йил қарийб 10 триллион сўм ресурс берилиши эълон қилинди.

Ажратилаётган маблағнинг 1 триллион 700 миллиард сўми Шароф Рашидов туманига тўғри келади. Шунингдек, Шароф Рашидов туманидаги 9 та маҳалланинг инфратузилмасини яхшилашга Жаҳон банкининг 8 миллион доллар маблағи берилади.

Туманнинг Эски Тошкентлик, Сарайлик, Яхтанлик, Тараққиёт маҳаллаларида 300 дан ортиқ хонадон мебелчилик билан шуғулланади. Ушбу 4 та маҳалла учун энг қулай ҳудуддан 3 гектар жойда мебелчилик маркази ташкил этилса, туманда мазкур соҳа саноат даражасига чиқади. Натижада 1,5 минг одамнинг даромади кўпаяди.

Давлатимиз раҳбари 250 мингдан зиёд аҳоли яшайдиган Шароф Рашидов туманида бирорта парк йўқлигига эътибор қаратди.

Шу боис, Янги ҳаёт маҳалласида фойдаланилмай турган 10 гектар майдонда яшил боғ барпо қилиш учун 10 миллиард сўм ажратилади.

Президентимиз яна бир нечта шундай имкониятларни санаб, туман ҳокимларига ажратилаётган маблағлардан унумли фойдаланиш ва уларни ўсиш нуқталарига йўналтиришни топширди.

Вилоятнинг бошқа туманларида ҳам савдо ва сервисни ривожлантириш учун имкониятлар кўп.

Масалан, Бахмалга олиб борадиган йўл таъмирталаб бўлгани учун Зоминга келаётган сайёҳлар шу ернинг ўзидан қайтиб кетяпти.

Ушбу туманлардаги тоғ ҳудудлари ягона туризм ҳалқасига бирлаштирилса, Зоминга келаётган сайёҳларнинг камида ярмини Бахмалга жалб қилиш мумкинлиги таъкидланди. Юзлаб сервис объекти ишга тушади, минглаб одам ишли бўлади, туризм экспорти каррасига ошади.

Мутасаддиларга келгуси йилда «Зомин – Бахмал – Ғаллаорол» йўлининг 158 километр қисмини таъмирлашни бошлаш топширилди.

Бахмал туманида 39 гектар майдонда 40 миллион доллар инвестиция ҳисобига туризм кластерини ташкил қилиш ташаббуси маъқулланди.

Умуман, Бахмалга ҳам «туризм тумани» мақоми берилиши белгиланди.