Бугун, 2 сентябрдан бошлаб автомобилларни Пискент синов мажмуасида синовлардан ўтказиш амалиёти тўхтатилади. Бу ҳақида Ўзбекистон техник жиҳатдан тартибга солиш агентлиги маълум қилди.

Хабарда айтилишича, агентлик томонидан истеъмолчилар манфаатларини таъминлаш ва сифат кафолатига эга бўлмаган автомобилларни республикамизга олиб кирилишини ҳамда жамоат йўлларда бахтсиз ҳодисаларнинг олдини олиш мақсадида, 2024 йилнинг 1 ноябридан бошлаб Пискент синов мажмуасида автотранспорт воситалари Вазирлар Маҳкамаси томонидан тасдиқланган техник регламентга мувофиқ синовлардан ўтказиб келинган.

Таҳлил натижаларига кўра, республикамизга техник регламентга мувофиқ транспорт тури маъқулланмаган енгил автомобилларнинг импорт қилингани сабабли, уларнинг синовлари бирма-бир ўтказилишига сабаб бўлган.

Маълум қилинишича, Ўзбекистонда 2024 йилгача фақатгина 3 та дилерлик марказлари фаолият юритган бўлса, улар атиги 15 та автомодель учун турини маъқуллаш ҳужжатини олган холос. Ҳозирги кунда эса, 21 та хорижий компанияларнинг расмий дилерлари ўз фаолиятини бошлаган ва 100 дан ортиқ автомобиль русумларига турини маъқуллаш ҳужжатлари расмийлаштирилган.

Шу туфайли, Ўзбекистонда расмий дилерлар ва сервис марказлари сони кескин ошганлиги ҳамда истеъмолчиларнинг расмий дилерлар билан ишлаш амалиёти жорий этилганлигини инобатга олиб, 2025 йилнинг 2 сентябридан бошлаб автомобилларни Пискент автополигонида синовдан ўтказиш амалиёти тўхтатилиши белгиланган.

Ўзбекистон техник жиҳатдан тартибга солиш агентлиги юртдошларимизга автомобиль харидини расмий дилерлар орқали амалга оширишни тавсия қилган.