Ўзбекистон 2024 йил давомида хориждан умумий қиймати 374,5 миллион АҚШ долларига тенг бўлган қарийб 4,2 миллион дона мобил телефон импорт қилди. Бу ҳақда Статистика агентлиги дастлабки маълумотларини эълон қилди.

Мамлакатга олиб келинган мобил телефонларнинг аксарияти Хитой, Ветнам ва Ҳиндистон каби давлатлардан импорт қилинган. Хусусан, Хитой Ўзбекистон бозорида энг йирик етказиб берувчи сифатида етакчилик қилмоқда. 2024 йилда 3,4 миллион дона телефон Хитойдан импорт қилинган, бу жами импортнинг катта қисмини ташкил этади.

Ветнамдан 589,4 минг дона телефон, Ҳиндистондан эса 113,6 минг дона телефон мамлакатга келтирилган. Шунингдек, Гонконгдан 46,1 минг дона, бошқа давлатлардан эса 5,4 минг дона телефон олиб кирилган. Ушбу кўрсаткичлар Ўзбекистон бозорида смартфон ва мобил алоқа воситаларига бўлган юқори талабни акс эттиради.

Мутахассисларнинг таъкидлашича, мамлакатда мобил технологияларга бўлган эҳтиёж йил сайин ошиб боряпти. Интернет ва рақамли хизматларнинг кенгайиши, замонавий смартфонларнинг ҳаётнинг ажралмас қисмига айланиши, шунингдек, рақамли иқтисодиётга ўтиш жараёни мобил қурилмаларга бўлган талабни сезиларли даражада оширган.

Юртимиз бозорига кириб келган аксарият смартфонлар «Samsung», «Apple», «Redmi» каби компанияларга тегишли. Келгусида Ўзбекистон ички бозорида маҳаллий ишлаб чиқариш ҳажмини ошириш орқали импортга бўлган қарамликни камайтириш режалаштирилган.

Шу билан бирга, дунёдаги етакчи смартфон ишлаб чиқарувчилари Ўзбекистон бозорини жадал ривожланаётган ҳудудлардан бири сифатида кўриб чиқмоқда. Бу эса келажакда турли хил ишлаб чиқарувчиларнинг Ўзбекистон бозорига янада фаол кириб келишига замин яратиши мумкин.