Андижонда Жанубий Фарғона канали сувини ифлослантирган корхона аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар қилди.

Аввалроқ ижтимоий тармоқларда Андижон вилояти Булоқбоши тумани Ширмонбулоқ қишлоғи ҳудудида Жанубий Фарғона канали сувида кўпиклар пайдо бўлгани юзасидан мурожаатлар тарқалганди.

Қайд этилишича, ҳолат юзасидан тегишли тартибда Андижон вилояти Экология, атроф-муҳитни муҳофаза қилиш ва иқлим ўзгариши бошқармаси, вилоят ҳокимлиги ҳамда мутасадди ташкилотлар билан ўрганиш ишлари олиб борилган.

Ўрганиш давомида 26 июль куни соат 9:00 лар атрофида сув юзасида кўпиклар пайдо бўлгани аниқланган. Ҳолат юзасидан тезкорлик билан сувдан намуналар олиниб, таҳлилдан ўтказилди.

Натижаларга кўра, Хўжаобод тумани «Солпи» МФЙ ҳудудида жойлашган «Н. Г.» МЧЖ томонидан матоларга ранг бериш цехидан чиқаётган оқова сув, тозалаш иншооти тўлиқ ишламаганлиги сабабли, қисман тозаланмасдан Жанубий Фарғона каналига ташланаётгани аниқланди.

Табиатга етказилган зарарни аниқлаш учун сув намуналари таҳлил қилинди. Тўпланган ҳужжатлар кўриб чиқиш ва тегишли чора кўриш учун суд органларига тақдим этилади.