«Миллий тикланиш» демократик партияси раиси Алишер Қодиров Россия давлат Думаси спикери Вячеслав Володиннинг «Тилни биладиган ишчилар Россияга келиши мумкин» деган сўзларига жавоб берди.

Биз учун одамлар рус тилини билган, урф-одатларимизни, маданиятимизни ҳурмат қилган ҳолда биз билан ишлашга келиши муҳим», — деган Володин ялпи мажлисда.

Ўзбек сиёсатдонига кўра, шубҳасиз, Россияга ишга бораётганлар рус тилини билишлари шарт, лекин бу Ўзбекистонда яшаётган русларни ҳам ўзбек тилини билишлари муҳим эмас, деган маънога тўғри келмайди.

«Ўзбекистонда яшаётган барча миллатли ватандошлар ўзбек тилини билишлари шарт. Қонунларимизда босқичма босқич боғча ва бошланғич таълимда бошқа миллатли ватандошларга ўз она тили ва қадриятларини ўрганишига шароит яратиш билан бир қаторда, ўзбек тили мажбурий ўрганадиган тил сифатида белгиланиши керак», деган у.

Жорий йилнинг февраль ойида ЎзЖОКУ ректори Шерзодхон Қудратхўжанинг «Ўзбекистонда яшаб, ўзбек тилини билмайдиганлар «босқинчи» ёки «аҳмоқ» эканини ўзлари ҳал қилиши керак» деган сўзларидан кейин «Россотрудничество» у ва унинг тузилмалари билан алоқаларни узишини билдирганди.