Афғонистоннинг Мозори Шариф шаҳрида буюк шоир ва мутафаккир Алишер Навоийнинг ҳайкали бутунлай бузиб ташланди. Ўзбекистон Ташқи ишлар вазирлиги мазкур масала юзасидан расмий изоҳ олиш мақсадида Афғонистон ҳукумати вакиллари билан тезкор равишда боғланган. Бу ҳақда вазирлик матбуот котиби Аҳрор Бурҳонов хабар берди.

Олинган маълумотларга кўра, Алишер Навоий ҳайкали ўрнатилган жой буюк аллома хотирасига етарлича муносиб эмаслиги, шоир ва мутафаккир учун янада кўркам мажмуа қурилиши лозимлиги боис ёдгорлик маҳаллий ҳокимият томонидан олиб ташланган.

«Ушбу бузиш ишлари Афғонистон Маданият ва ахборот вазирлиги ҳамда кенг жамоатчилик билан келишилмагани алоҳида таъкидланиб, афғон тарафи ҳолат юзасидан таассуф билдирди», деб ёзади Ўзбекистон ТИВ вакили.

Унинг қўшимча қилишича, Афғонистон ҳукумати вакиллари нафақат Ўзбекистон, балки Афғонистон халқи учун мўътабар бўлган Алишер Навоий хотирасини муносиб тарзда абадийлаштирилишини тасдиқлаган. Шунингдек, улар буюк шоир ва мутафаккир шарафига алоҳида ёдгорлик барпо этишга ваъда берган.

Афғонистон томони ҳудудни ободонлаштириш, шоир ҳаёти ва ижодий меросига оид маълумотларни ўз ичига олган ёзувларни тиклаш ҳамда амалдаги қарорларга мувофиқ янги ёдгорлик барпо этиш ҳамда у жойлашган майдонга Алишер Навоий номи қўйилиши режалаштирилганини маълум қилган.