Bosh prokuratura huzuridagi Departamentning Jizzax shahri boʻlimi xodimlari tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida “H.A.” xususiy korxonasi rahbari J.R. va dorixona sotuvchisi fuqaro I.R. tarkibida kuchli taʼsir qiluvchi moddalari mavjud boʻlgan 136 dona “Omnadren 250” nomli dori vositasini fuqaro M.X.ga 7,3 million soʻmga shifokor retseptisiz sotgan vaqtida ashyoviy dalillar bilan qoʻlga olingan.

Shu kabi yana bir holat, departamentning Zafarobod tumani boʻlimi va IIB xodimlari hamkorligida oʻtkazilgan tezkor tadbirda ham aniqlangan.

Unga koʻra, fuqaro Z.U. turli nomdagi tarkibida kuchli taʼsir qiluvchi moddalari mavjud boʻlgan 602 dona dori vositalarini 2,3 million soʻmga sotgan vaqtida ashyoviy dalillar bilan ushlangan.

Hozirda mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishlari qoʻzgʻatilib, tergov harakatlari boshlab yuborilgan.