Ukraina prezidenti Vladimir Zelenskiy juma kuni Donald Tramp bilan uchrashuvda Rossiyaga zarba berish uchun “Tomahawk” raketalarini ololmadi.

Zelenskiy Vashingtonga uzoq masofaga uchuvchi qanotli raketalarni olish umidida borgan edi, uning fikricha, bu raketa Rossiya ichidagi neft va energetika obyektlariga maqsadli zarbalar bera oladi va Kremlning urush iqtisodiyotini yoʻq qiladi.

Oq uydagi ishchi tushlik paytida Tramp urushni “Tomahawk” haqida oʻylamasdan hal qilishga umid bildirdi va bu qurol Amerikaning oʻziga ham kerakligini qoʻshimcha qildi. AQSH prezidenti har ikki tomonni janglarni ayni vaqtda hozirgi chiziqlarda toʻxtatishga chaqirdi.

Shunday qilib, Zelenskiy “quruq qoʻl” bilan qaytdi, ammo uchrashuvni samarali deb taʼriflagan. AQSH eskalatsiyani xohlamagani uchun Tramp “Tomahawk” haqida qoʻshimcha izoh berishdan bosh tortgan.

“Ikkala tomon ham uyiga qaytishi, oilasi oldiga borishi, qotillikni toʻxtatishi kerak. Shunday boʻlishi kerak”, — degan Oq uy rahbari uchrashuvdan soʻng Floridaga uchish jarayonida.

Uchrashuvdan bir kun oldin Tramp Putin bilan telefon orqali gaplashib, tez orada Vengriyada koʻrishishga kelishib olgan edi. Aytilishicha, Putin ushbu qoʻngʻiroq chogʻida Rossiyaning Moskva va Sankt-Peterburg kabi yirik shaharlarini nishonga olish radiusiga ega boʻlgan “Tomahawk” jang maydoniga jiddiy taʼsir koʻrsatmasligini taʼkidlagan. Ammo ularning Ukrainaga berilishi AQSH va Rossiya munosabatlariga putur yetkazishini aytgan.

Nima uchun Ukraina “Tomahawk”ka intilmoqda?

“Tomahawk” raketalari Ukrainaning hozirgi qurol-aslaha omboridagi boshqa raketalarga qaraganda ancha uzoq masofaga ega. Tramp ularni yetkazib berish boʻyicha muzokaralarni kuchaytirgan boʻlsada , bu haqida aniq bir fikr bildirmagan.

Oq uydagi juma kungi uchrashuv oldidan Zelenskiy Ukraina dronlarini AQSH “Tomahawk”lariga ayirboshlashni taklif qilgan boʻlishi mumkin.

“Ukrainada minglab dronlarni ishlab chiqaryapmiz, lekin bizda «Tomahawk” yoʻq. Ular minglab dronlarga ega boʻlishlari mumkin, biz bu borada ishlashga tayyormiz», — degan Zelenskiy.

Zelenskiy Tramp bilan uchrashuvdan soʻng Yevropa yetakchilari bilan gaplashib, ularga maʼlumot bergan. Yevropalik ittifoqchilar Rossiyaning davom etayotgan tajovuzidan Ukrainani himoya qilishga sodiqligini bildirgan.

Zelenskiy Tramp urushga yechim beradigan shaxs deb biladi va Yaqin Sharqdagi adolat Ukraina uchun ham ishlashiga umid bildirgan.

Shunga qaramay Tramp janglarni tugatishda Ukraina yerlaridan voz kechishi borasida turli pozitsiyada qolmoqda. Avgust oyida Putin bilan uchrashuvi oldidan u urush tugashi uchun yer almashish zarurligini aytgan, keyinchalik u Ukraina Rossiya tomonidan bosib olingan barcha hududlarni qaytarib olishiga ishonishini bildirgan edi. Tramp juma kungi chiqishida Putin bu safar kelishuvga erishmoqchiligini aytgan.