Gʻayrat OTAJONOV/“Xalq soʻzi”. Nukus tumani tibbiyot birlashmasida “Elektron poliklinika” va “Elektron shifoxona” axborot tizimlari takomillashtirilib, “Yagona tibbiyot tizimi” yoʻlga qoʻyildi.

Yangi tizimning joriy etilishi hisobiga, ilgari shifokor qabuliga borgan odam 40 daqiqa kutgan boʻlsa, endilikda navbatga onlayn yozilish orqali kutish vaqti keskin qisqardi. “Dmed” mobil platformasi koʻmagida uyda oʻtirgan holda ham shifokor qabuliga yozilish mumkin.

Bemorlarning poliklinikaga kelishi natijasida toʻplanadigan tibbiy maʼlumotlari elektron shaklda saqlanadi. Shifokor koʻrigidan oʻtish jarayonida topshirilgan tahlillar xulosasini elektron dastur orqali olish imkoniyatiga ham mavjud.

Tizim bir qator platformalar bilan integratsiya qilindi. Fuqaroning yuzini aniqlash dasturi yordamida darhol xizmat koʻrsatishga oʻtilib, istalgan tibbiyot muassasasidan bemor haqidagi tibbiy maʼlumotlar real vaqt rejimida olinadi.

Tibbiyot sohasidagi bunday imkoniyatlar ortiqcha ovoragarchilikni kamaytiradi, tibbiy xizmat koʻrsatish sifati va samaradorligini oshiradi.