Oʻzbekiston musulmonlari idorasi Umra mavsumi 10-sentyabrdan boshlanishini eʼlon qildi. Bu haqda idora matbuot xizmati xabar berdi.

Maʼlum qilinishicha, Oʻzbekiston musulmonlari idorasi va Din ishlari boʻyicha qoʻmita tomonidan tashkil etiladigan “Umra-2024”ning navbatdagi mavsumi joriy yilning 10-sentyabr kunidan boshlanadi.

“Hamyurtlarimiz «Uzbekistan Airways” aviakompaniyasi orqali toʻgʻridan toʻgʻri reyslarda Saudiya Arabistoniga olib boriladi. Ziyoratchilar Madina shahrida 3 kun, Makka shahrida esa 7 kun boʻladi. Mavsum davomida tajribali ishchi guruhi va imom-xatiblardan iborat ellikboshilar hamda malakali shifokorlar ularga hamroh boʻladi», deyiladi xabarda.

Qoʻshimcha qilinishicha, ziyoratchilar Madina shahrida “Grand Shahba”, Makka shahrida esa “Marmara Group Hotel” mehmonxonalarida istiqomat qiladi. Mehmonxona xonalari 3-4 oʻrinli boʻlib, 3 mahal taomlar, shirinlik va sarxil mevalar tortiq qilinadi.

Mazkur shaharlarda muborak qadamjolarga ziyorat tashkil etiladi. Mehmonxonalarda tibbiyot punktlari, transport xizmati va ishchi guruhlari shtablari 24 soat davomida faoliyat yuritadi. Safar yakunida zam-zam suvi hadya qilinadi.