AQSH prezidenti Donald Tramp Kanadaga Ontario bilan Michiganni bogʻlaydigan yangi koʻprikni ochishga yoʻl qoʻymasligini maʼlum qildi. Uning aytishicha, AQSH “adolatli munosabat” va kompensatsiya olmaguncha bunga ruxsat berilmaydi.

“Biz muzokaralarni darhol boshlaymiz. Biz ularga taqdim etgan barcha imkoniyatlarni hisobga olsak, ehtimol, ushbu aktivning kamida yarmiga egalik qilishimiz kerak. Amerika bozori hisobidan shakllanadigan daromadlar juda ulkan boʻladi”, — deb yozdi Tramp Truth Social ijtimoiy tarmogʻida.

Respublikachilar partiyasi vakili boʻlgan Tramp avvalgi maʼmuriyatni kanadalik materiallardan foydalanishga ruxsat bergani uchun tanqid qildi, shuningdek, Amerika sut mahsulotlariga qoʻyilgan tariflar va alkogol mahsulotlariga nisbatan cheklovlardan norozilik bildirdi.

Tramp taʼkidlashicha, koʻprik ochilishidan oldin AQSH ushbu infratuzilma aktivida sezilarli ulushga ega boʻlishi va Amerika bozori hisobidan olinadigan foydadan bahramand boʻlishi kerak.

Qayd etilishicha, koʻprik qurilishi loyihasi Kanadaning federal hukumati tomonidan moliyalashtirilmoqda. Koʻprik barcha rasmiy tekshiruvlardan soʻng ochilishi rejalashtirilgan. Qurilish xarajatlarini qoplash esa koʻprikdan oʻtish uchun olinadigan yigʻimlar hisobidan amalga oshirilishi koʻzda tutilmoqda.