Ijtimoiy tarmoqlarda Toshkentda fuqaro 9-qavatdan tushib ketgani tasvirlangan video va xabarlar tarqaldi. Ushbu holat yuzasidan Toshkent shahar IIBB maʼlumot berdi.

Qayd etilishicha, joriy yilning 21-iyul kuni taxminan soat 01.30 larda Yunusobod tumani, 9-mavze hududidagi koʻp qavatli uylarning birida, 2002-yilda tugʻilgan fuqaro T.R, shu uyning 9-qavatidagi derazadan oʻzini pastga tashlagan. U kirish yoʻlagining tom qismiga urilib, yerga tushgani aytilmoqda.

Natijada fuqaro “BMYOJ, BMCH, chap oʻmrov suyagi, oʻng koʻkrak suyagi, birinchi bel umurtqasi kompression sinishi 2,3-daraja, travmatik shok 2-darajasi” tashxisi bilan shifoxonaga olib borilgan va hozirda shifokorlar nazoratida.

“Oʻrganish jarayonida aniqlanishicha, fuqaro 2024-yilning oxiridan buyon ruhiyatida oʻzgarishlar sodir boʻlishi boshlanganligi va psixolog-shifokor tekshiruvlaridan oʻtkazilganligi maʼlum boʻldi”, deyiladi xabarda.

Mazkur holat yuzasidan Yunusobod tumani IIO FMB tomonidan tergovga qadar tekshiruv oʻtkazilmoqda.

Avvalroq Toshkentda 19 yoshli qiz harakatdagi mashinadan oʻzini tashlagani toʻgʻrisida xabar qilgandik.