10-iyun kuni Oliy Majlis Senati Raisi Tanzila Narbayeva IV Toshkent xalqaro investitsiya forumi doirasida mamlakatimizga rasmiy tashrif bilan kelgan Bolgariya Respublikasi Prezidenti Rumen Radev bilan uchrashuv oʻtkazdi. Uchrashuv samimiy va ochiq ruhda oʻtib, ikki tomonlama munosabatlarni yanada rivojlantirish masalalari muhokama qilindi.

Tanzila Narbayeva oliy martabali mehmonni samimiy qutlab, Bolgariya Prezidentining tashrifi Oʻzbekiston va Bolgariya oʻrtasidagi oʻzaro manfaatli hamkorlikni mustahkamlashga boʻlgan intilishining yaqqol ifodasi ekanini taʼkidladi. Suhbat davomida Oʻzbekiston-Bolgariya munosabatlari 28 ta ikki tomonlama hujjat asosida barqaror va izchil rivojlanib borayotgani qayd etildi.

Prezident Rumen Radev oʻz navbatida Toshkent xalqaro investitsiya forumini Markaziy Osiyo mintaqasining iqtisodiy taraqqiyoti va xalqaro sarmoyaviy hamkorlikni chuqurlashtirishga xizmat qiluvchi muhim platforma sifatida baholadi. U mazkur forumda ishtirok etishdan mamnun ekanini bildirdi.

Uchrashuvda parlamentlararo aloqalarni faollashtirish masalalariga alohida eʼtibor qaratildi. Bolgariya Prezidentining Oliy Majlis Senatiga tashrifi ikki mamlakat parlamentlari oʻrtasidagi muloqotni faollashtirish va yanada chuqurlashtirish uchun muhim qadam sifatida baholandi.

Tomonlar ikki mamlakat parlamentlari oʻrtasida tizimli hamkorlikni yoʻlga qoʻyish, palatalar va tegishli qoʻmitalar rahbarlari darajasida muntazam uchrashuvlar oʻtkazish, parlamentlararo doʻstlik guruhlari rejalari ustida ishlash va qonun ijodkorligi sohasida tajriba almashish zarurligi boʻyicha yakdil fikr bildirdi.