Qashqadaryo viloyatining Nishon tumanida joylashgan “Talimarjon IES”da umumiy quvvati 1065 megavatt, loyiha qiymati esa 944,87 million AQSH dollari boʻlgan yangi bugʻ-gaz qurilmalari ishga tushirildi.

Mamlakatimiz energotizimida muhim ahamiyatga ega boʻlgan ushbu loyiha bir qator xorijiy va mahalliy moliya tashkilotlarining koʻmagi hamda Ispaniya, Yaponiya, Turkiya kabi davlatlarining yirik kompaniyalari pudratchiligida amalga oshirildi.

- Ushbu bugʻ-gaz qurilmalari orqali korxonada yiliga 8 milliard kVt-soat elektr energiyasi ishlab chiqaradi va yuqori tejamkor texnologiyalarni qoʻllash hisobiga yiliga 300 million kub metr tabiiy gaz tejalishiga erishiladi, - deydi “Talimarjon IES” AJ bosh direktori Jasur Pirmanov. – Qurilma Yaponiya, Koreya, Xitoy va AQSH kabi yetakchi mamlakatlardan keltirilgan eng zamonaviy texnologiyalar bilan jihozlangan boʻlib, toʻliq avtomatlashtirilgan holda boshqariladi.

Yangi loyiha Samarqand va Buxoro viloyatlari isteʼmolchilarini, Qarshi magistral kanalidagi yettita nasos stansiyasini va yana koʻplab aholi punktlarini ishonchli elektr energiyasi bilan taʼminlashga xizmat qiladi.

Eʼtiborli tomoni, yangi loyihaning ishga tushirilishi natijasida korxonada yana 200 dan ortiq yangi ish oʻrinlari yaratildi.

Jahongir BOYMURODOV, “Xalq soʻzi”.