Ijtimoiy tarmoqlarda Toshkent shahrida taksi haydovchisi mijozga narkotik modda qoʻshilgan suv ichirib uni uxlatib qoʻygani va uning nomiga 12 million soʻm miqdorida kredit rasmiylashtirib olgani toʻgʻrisida xabarlar tarqaldi. Ushbu holatga poytaxt IIBB matbuot xizmati oydinlik kiritdi.

Aniqlanishicha, taksiga chiqqan ayol avvaldan spirtli ichimlik taʼsirida mast holatda boʻlgan va haydovchiga manzil geolokatsiyasini koʻrishi uchun oʻz ixtiyori bilan qoʻl telefonini topshirib qoʻygan. Taksichi uni narkotik modda qoʻshilgan suv bilan uxlatib qoʻymagan.

Mashina haydovchisi va uning sherigi uxlab qolgan ayolning telefonidagi ilova bilan uning nomiga onlayn banklarning biridan 12 million soʻm miqdorida mikroqarz rasmiylashtirib, boshqa kartaga oʻtkazish orqali bankomatdan naqdlashtirib olgan.

Toshkent shahar IIBB Axborot texnologiyalari sohasidagi jinoyatlarga qarshi kurashish boshqarmasi xodimlari tomonidan olib borilgan tezkor tadbirlar natijasida har ikkala shaxs qoʻlga olindi.

Holat yuzasidan Jinoyat kodeksining 169-moddasi (oʻgʻrilik) bilan jinoyat ishi qoʻzgʻatildi. Ayni paytda jabrlanuvchiga yetkazilgan moddiy zarar qoplab berilgan. Tergov harakatlari davom ettirilmoqda.