Bandixon tumani “Chashma” fermer xoʻjaligidagi paxta maydonlarida birinchilardan terim jadal surʼatda boshlandi.

Surxondaryo viloyatida yigʻim-terimga puxta tayyorgarlik koʻrilgan. Dalalarda texnikalar shay holatga keltirilgan, terimchilar otryadlari uchun barcha zarur shart-sharoitlar yaratilgan. Oziq-ovqat, yoqilgʻi-moylash mahsulotlari, maxsus vositalar zaxirasi shakllantirilib, mavsumni sifatli va qisqa muddatda yakuniga yetkazishga katta eʼtibor qaratilgan.

Darvoqe, anʼanaga koʻra, paxta yigʻim-terim mavsumi arafasida Al-Hakim at-Termiziy majmuasida ehson tadbiri tashkil etilgan edi. Unda davlat va jamoat tashkilotlari rahbarlari, tuman hokimlari, qishloq xoʻjaligi faxriylari va jamoatchilik vakillari ishtirok etdi.

Joriy mavsumda paxta terimida Xitoyda ishlab chiqarilgan zamonaviy FM WORLD 4MZ-4 rusumli paxta terish mashinalari viloyat dalalarida birinchi bor sinovdan oʻtkaziladi. Bu texnika hosilni tez va sifatli yigʻishda foydalanish uchun klaster va fermer xoʻjaliklari tomonidan jami 60 dona miqdorida xarid qilingan. Zamonaviy mashina paxtakorlar mehnatini yengillashtirishga xizmat qiladi.

Bu yil Surxondaryo viloyati paxtakorlari 62 ming 852 gektar maydonda gʻoʻza parvarishladi, birinchi boʻlib paxta topshirish rejasini bajarishni maqsad qilishgan.

Farhod ESONOV

“Xalq soʻzi”.