Suriyada prezident Bashar Asad rejimini agʻdargan “Hayʼat Tahrir ash-Shom” rahbari Al-Juloniy mamlakatning kelgusi taqdiri haqida fikr bildirdi. Suriya urushdan charchagan va qoʻshnilari yoki Gʻarb uchun hech qanday xavf tugʻdirmasligini aytib oʻtdi. Bu haqda Al-Juloniy BBCga bergan intervyusida maʼlum qildi.

“Hayʼat Tahrir ash-Shom” hech qachon tinch aholiga yoki fuqarolik hududlarga hujum qilmagan. Aslida ular oʻzlarini Asad rejimi jinoyatlarining qurbonlari deb hisoblaydi. Jabrlanganlarga zolimlar kabi munosabatda boʻlishni toʻxtating, HTSHni terroristik tashkilotlar roʻyxatidan chiqaring», — deydi Juloniy.

“Hayʼat Tahrir ash-Shom” oʻz faoliyatini 2016-yilda “Al-Qoida”dan ajralib chiqqan holda boshlagan. Bugungi kunda BMT, AQSH, Yevropa ittifoqi, Buyuk Britaniya, Rossiya va boshqa koʻplab mamlakatlar “Hayʼat Tahrir ash-Shom”ni terroristik tashkilotlar roʻyxatiga kiritgan.

Al-Juloniy Suriyani Afgʻonistonga oʻxshatish haqidagi shubhalarga ham keskin fikr bildirib oʻtdi. Unga koʻra, bu mamlakatlar juda farqli va turli anʼanalarga ega. Suriyada mentalitet boshqacha.

Juloniyning fikricha, Suriya kelajagi uchun ayollar taʼlimi juda zarur. Kelajakda ham ayollar taʼlimiga alohida eʼtibor qaratiladi. Sakkiz yildan ortiq vaqt davomida faoliyat yuritib kelayotgan Idlibdagi universitetlarda koʻplab ayollar taʼlim olgan. Bugungi kunga kelib universitetlardagi ayollarning ulushi 60 foizdan yuqoriroqni tashkil qiladi.

“Suriyada huquqshunoslardan iborat qoʻmita tashkil etilib, unda yangi konstitutsiyani ishlab chiqamiz. Har qanday hukmdor yoki prezident qonunga boʻysunishi shart. Suriya hech qachon ikkinchi Afgʻonistonga aylanmaydi”, — deya qatʼiy taʼkidlaydi Juloniy.