Ijtimoiy tarmoqlarda soliq xodimlari ekanligi aytilayotgan erkaklarning ayollar bilan tortishuvi aks etgan video tarqaldi.

Davlat soliq qoʻmitasi raisi Sherzod Kudbiyev mazkur holatga munosabat bildirdi.

«Kuni kecha ijtimoiy tarmoqlarda tarqalgan Olmaliq shahrida boʻlgan noxush hodisa biz uchun juda uyatli. Bu bizning shaʼnimizga, soliq xizmatining vazifalariga toʻgʻri kelmaydigan hodisa. 

Men oʻzim sizlarga shaxsan vaʼda qilaman, men ayni vaqtda Samarqand shahrida xizmat safaridaman, qaytib borishim bilan voqea sodir boʻlgan joyga oʻzim boraman. Lekin ungacha kutmasdan mazkur hodisada oʻzini nooʻrin tutgan va nooʻrin xizmat vazifasini bajargan xodimlarga nisbatan tegishli jazo choralari koʻriladi», dedi qoʻmita raisi.

Shuningdek, Sherzod Kudbiyev bu holat soha xodimlariga umuman yarashmasligini qayd etgan.

“Soliq idoralari kuch ishlatar tashkilot emas, balki tadbirkorlarimizga koʻmakchi boʻladigan idora. Bunday ayanchli holatlar yuz beryapti va biz buni ildizi bilan yulib tashlashimiz kerak. Koʻrilgan choralar toʻgʻrisida sizlarga qoʻshimcha axborot beramiz. Bunday holat yuz bergani uchun, mana shunday xodimlar oramizda borligi uchun fuqarolarimiz, butun xalqimizdan uzr soʻrayman”, deya murojaatini yakunlagan Sherzod Kudbiyev.