Bugungi kunda internet saytlari va ijtimoiy tarmoqlarda Nizomiy nomidagi Toshkent davlat pedagogika universiteti dekan oʻrinbosari hamda talaba qiz oʻrtasida boʻlib oʻtgan hodisa toʻgʻrisida tarqalgan xabarlar jamoatchilikning jiddiy tanqidiga sabab boʻlmoqda.

Bunday holatlarning yuz berishi qadriyatlarimizga tamomila zid xatti-harakatlar boʻlib ayniqsa uning taʼlim dargohida yuz berganligi juda achinarli holat, albatta.

Senatning Fan, taʼlim va sogʻliqni saqlash masalalari qoʻmitasi hamda Xotin-qizlar va gender tenglik masalalari qoʻmitalari tomonidan kelgusida bunday noxush holatlarning oldini olish maqsadida respublikadagi barcha oliy taʼlim muassasalari rahbarlari ishtirokida videokonferensaloqa shaklida davra suhbati oʻtkazildi.

Davra suhbatida oliy taʼlim muassasalarida pedagog xodimlarning oʻzini tutishlari, odob-axloq qoidalariga rioya qilgan holda faoliyat yuritishlari, talabalar bilan muloqotda ularga zoʻravonlik qilishlari, tazyiq oʻtkazishlari, jamiyatda yurish-turish qoidalariga zid ravishda nojoʻya xatti-harakatlar qilishlari taʼlim tizimi xodimlari uchun sharmandali holat ekanligi, buning oqibatida har bir aybdor shaxs javobgarlikka tortilishi haqida mehnat jamoasi oʻrtasida doimiy tushuntirish ishlarini olib borish zarurligi taʼkidlandi.

Shuningdek, senatorlar tomonidan talabalarga ham bunday noxush holatlar yuz berganda zudlik bilan ishonch telefonlari yoki huquqni muhofaza qiluvchi organlarga xabar berishlari kerakligi tushuntirildi.

Davra suhbatida oliy taʼlim muassasalari rektorlari soʻzga chiqib, talabalarning xavfsizligi uchun oliy taʼlim muassasasining har bir xodimi masʼul ekanligi, ularga nisbatan nojoʻya xatti-harakatlar qilishga yoʻl qoʻymaslik boʻyicha qatʼiy choralar koʻrishlari, bunda jamoatchilik nazoratini kuchaytirish lozimligini maʼlum qilishdi.