Turin politexnika universitetida qayta tiklanuvchi energiya texnologiyalariga bagʻishlangan xalqaro seminar boʻlib oʻtdi.

Tadbirda vazirlik va idoralar vakillari, soha mutaxassislari hamda Senatning Agrar, suv xoʻjaligi masalalari va ekologiya qoʻmitasi raisi oʻrinbosari Sayyora Abdikarimova ishtirok etdi.

Seminarda qayta tiklanuvchi energiya manbalarini joriy etish, quyosh va shamol elektr stansiyalari tizimlarini loyihalash, resurslarni baholash, energetika obyektlarini optimallashtirish masalalari muhokama qilindi.

Taʼkidlanganidek, Oʻzbekiston 2030-yilga qadar elektr energiyasi ishlab chiqarish hajmining kamida 40 foizini qayta tiklanuvchi manbalar hisobiga taʼminlashni maqsad qilgan. Bu yiliga 25 mlrd kub metr tabiiy gazni tejash va atmosferaga chiqindilarni 34 mln tonnaga kamaytirishga xizmat qiladi.

Seminar doirasida “ACWA Power Uzbekistan” kompaniyasining investitsion loyihalari boʻyicha taqdimot oʻtkazildi, xorijiy ekspertlar tomonidan “yashil vodorod” ishlab chiqarish, energiya saqlash tizimlari va dekarbonizatsiya boʻyicha ilgʻor tajribalar taqdim etildi.

Bu borada olib borilayotgan ishlar, mavjud muammolar va ularning yechimlariga bagʻishlangan maʼruzalar eshitildi, shuningdek, tizimni yanada takomillashtirish boʻyicha tavsiyalar berildi.