Xoʻjaobod tumanidagi “Sarqamish” mahallasida aholi turmush sharoitini yaxshilash maqsadida qator ishlar amalga oshirildi. Hududning infratuzilmasi yangilanib, koʻrkam qiyofasi yanada obod koʻrinish kasb etdi.

Ushbu manzilda yangi elektr va gaz tarmoqlari oʻrnatildi. 2,5 kilometr ichki yoʻllar tekislanib, ayrim koʻchalarga shagʻal yotqizildi. Shuningdek, 20 ta xonadon ichimlik suvi tarmogʻiga ulandi, 1 kilometr drenaj zovurlari tozalandi. Mahalladagi 2000 dan ziyod daraxtlarga shakl berildi va koʻchalar chiqindilardan tozalandi.

— Olib borilgan ishlar odamlarning kundalik hayotida katta qulaylik yaratdi, — deydi mehnat faxriysi Marhaboxon Sotvoldiyeva. —Avval yoʻllarimiz oʻydim-chuqur boʻlib, harakatlanish qiyin edi. Endi esa ravon boʻldi. Elektr va gaz taʼminoti yaxshilanishi bilan turmushimizda katta yengillik sezilyapti. Bu kabi ishlar aholi turmush tarzini tubdan oʻzgartirib yubordi.

Amalga oshirilgan bunday xayrli ishlar “Sarqamish” aholisi uchun nafaqat qulaylik, balki mahallaning yanada obod va koʻrkam boʻlishiga xizmat qilmoqda.

Saminjon HUSANOV

“Xalq soʻzi”.