AQSH Gʻazo sektorida hokimiyatni bosqichma-bosqich Falastin fuqarolik tuzilmalariga topshirishni maqsad qilgan. Bu haqda AQSH davlat kotibi Marko Rubio maʼlum qildi, deb yozadi TASS.

— Biz oxir-oqibat Gʻazoda Falastin fuqarolik hokimiyatining shakllanishini koʻrishni istaymiz. Aynan shunga intilyapmiz. Gʻazoda falastinlik politsiyaning faoliyat yuritishini ham koʻrishni xohlaymiz, — dedi Rubio.

Davlat kotibining taʼkidlashicha, Gʻazoda hokimiyatni falastinliklarga bosqichma-bosqich topshirishning oʻzgarmas sharti — HAMAS harakatining taʼsirini butunlay yoʻqotish hisoblanadi.

Rubioning soʻzlariga koʻra, kelajakda shakllantiriladigan Falastin politsiya kuchlari boshqa mamlakat mutaxassislari tomonidan tayyorlanadi va oʻqitiladi.

— Albatta, bu jarayon vaqt talab etadi. Chunki politsiyaga odamlarni shunchaki ishga olish mumkin emas — ularni tekshirish, tayyorlash, zarur infratuzilmani yaratish lozim. Bu ishga atigi yetti-sakkiz kun boʻldi, hali oldinda juda koʻp ishlar turibdi. Ammo biz bu jarayonni oxirigacha yetkazishga qatʼiy bel bogʻlaganmiz, — dedi Marko Rubio.