Rossiya prezidenti Vladimir Putin mamlakat xavfsizlik kengashi doirasida yadroviy qurol sinovlariga tayyorgarlik koʻrish boʻyicha ishlarni boshlash ehtimoli yuzasidan maʼlumot toʻplash, tahlil oʻtkazish va tegishli takliflar ishlab chiqishni topshirdi. Bu haqda RBK xabar berdi.

Putin bu topshiriqni Xavfsizlik kengashi aʼzolari bilan oʻtkazilgan yigʻilish chogʻida bergan.

“Tashqi ishlar vazirligi, Mudofaa vazirligi, maxsus xizmatlar hamda tegishli fuqaroviy idoralarga ushbu masala boʻyicha qoʻshimcha maʼlumot toʻplash, uni Xavfsizlik kengashi doirasida tahlil qilish va yadroviy qurol sinovlariga tayyorgarlik ishlarini boshlash ehtimoli yuzasidan uzviy takliflar kiritishni topshiraman”, — dedi Putin.

Putinning soʻzlariga koʻra, Rossiya rahbariyatining Yadro sinovlarini toʻliq taqiqlash toʻgʻrisidagi shartnoma (CTBT) qoidalaridan chekinish niyati yoʻq. Biroq shartnoma ishtirokchisi boʻlgan boshqa davlatlar sinov oʻtkazsa, Rossiya “mos va adekvat javob choralarini koʻrishga majbur boʻladi”.

Eslatib oʻtamiz, bundan avval AQSH prezidenti Donald Tramp Vashington yadroviy qurol sinovlarini boshlashi mumkinligini aytgan edi.