Rossiya tashqi ishlar vazirligi matbuot kotibi Mariya Zaxarova Moskva Ukrainaga mojarodan keyin xalqaro xavfsizlik kuchlarini joylashtirish masalasini hech qanday formatda muhokama qilmasligini maʼlum qildi.

“Rossiya uchun xorijiy intervensiya mutlaqo qabul qilib boʻlmaydigan va xavfsizlikka tahdid soluvchi holat. Shuning uchun bu masala muhokama qilinmaydi”, — dedi Zaxarova Vladivostokdagi Sharqiy iqtisodiy forumda.

Uning bayonoti Yevropa Komissiyasi prezidenti Ursula fon der Lyayen Financial Times gazetasiga YI Ukrainaga koʻp millatli kuchlarni joylashtirish boʻyicha aniq rejalarga ega, degan intervyusi ortidan yangradi.

Shu bilan birga, Ukraina prezidenti Vladimir Zelenskiy va Yevropa yetakchilari mojarodan keyin Kiyev uchun xavfsizlik kafolatlarini muhokama qilish maqsadida Parijda yigʻilishi kutilmoqda. Fransiya prezidenti Emmanuel Makron xavfsizlik boʻyicha tafsilotlar ishlab chiqilganini, ammo ular hali maxfiyligicha qolayotganini bildirdi.

“Biz, yevropaliklar, tinchlik kelishuvi imzolangan kun Ukrainaga xavfsizlik kafolatlarini taqdim etishga tayyormiz”, — dedi Makron.

Rossiya esa har qanday kelishuv 2022-yildan beri anneksiya qilingan toʻrtta hududni oʻz ichiga olishi kerakligini taʼkidlasa, Kiyev hududlardan voz kechishga rozi emas.

AQSH prezidenti Donald Tramp mojaroga tez fursatda yakun yasashni vaʼda qilgan, biroq Moskva va Kiyev potensial tinchlik shartlari boʻyicha kelisha olmayapti. Trampning Zelenskiy bilan telefon orqali muloqoti payshanba kuni boʻlishi, yaqin vaqtlarda esa Vladimir Putin bilan ham suhbatlashishi rejalashtirilgan.