Saudiya Arabistonining “Al-Nasr” klubi sardori Krishtianu Ronaldu navbatdagi tur oʻyinidan soʻng jiddiy jarohat olgani maʼlum boʻldi. Bu haqda klub matbuot xizmati xabar berdi.

Kecha, 3-mart kuni eʼlon qilingan xabarda 41 yoshli portugaliyalik futbolchi son orqa mushak qismi (hamstring)dan jiddiy jarohat olgani va hozirda u bilan reabilitatsiya dasturi boshlangani rasman tasdiqlangan. Biroq forvardning qaytish muddati hozircha ochiqlanmagan.

Ronaldu joriy yilning 28-fevral kuni “Al-Fayha”ga qarshi oʻyinning 12-daqiqasida penaltini amalga oshira olmadi. U uchrashuvning 81-daqiqasida murabbiylar shtabiga ishora bergach, Abdulloh Al-Hamdonga almashtirildi va maydonni noqulay holatda tark etdi. Bahsda “Al-Nasr” gʻalabaga erishgan boʻlsa-da, ushbu yoʻqotish jamoa uchun muhim pallada sodir boʻldi — klub Saudiya Pro-ligasi peshqadamligini saqlab qolishga intilmoqda.

Mavsumda 21 gol urgan va liganing eng yaxshi toʻpurari boʻlib turgan 41 yoshli hujumchining mart oyida “Neom SK” va “Al-Xalij”ga qarshi oʻyinlarda ishtirok etishi soʻroq ostida qolmoqda. Shuningdek, u Portugaliya terma jamoasining Meksika hamda AQSHga qarshi oʻrtoqlik bahslarida maydonga tushishi ham nomaʼlum.

Ushbu xabarlar fonida xavfsizlikka oid mish-mishlar ham paydo boʻlgan. Unga koʻra, Ar-Riyoddagi AQSH elchixonasiga dron hujumi uyushtirilganidan soʻng, Ronalduga tegishli xususiy samolyot tungi paytda Madridga uchib ketgani qayd etilgan. Vaziyat boʻyicha turli signallar muxlislarni xavotirda qoldirmoqda.