Foto: AP

“Axios” portali AQSHning Ukrainaga hujum qurollarini topshirish rejalari haqida xabar berdi.

AQSH prezidenti Donald Tramp Ukrainaga qurol yetkazib berishni yana tiklamoqda. Yangi “Patriot” havo mudofaa tizimlarini topshirish allaqachon eʼlon qilingan edi. Endi Vashington Kiyevni hujum qurollari bilan ham taʼminlamoqchi.

Portalga koʻra, Donald Trampni bunga undagan sabablardan biri 3-iyul kuni Rossiya prezidenti Vladimir Putin bilan telefon orqali suhbat boʻlgan. Aytilishicha, Rossiya prezidenti “kelgusi ikki oy ichida Rossiya muhim mavqega ega boʻlgan Ukraina viloyatlarining maʼmuriy chegaralarigacha yangi hujum harakatlarini amalga oshirishini aniq aytgan”. Hujumlar Ukraina viloyatlariga yoki Rossiyaning yangi hududlariga amalga oshirilishi aniq emas. Chunki AQSH ularning Rossiyaga qoʻshilishini tan olmaydi.

Bir kundan keyin Donald Tramp Fransiya prezidenti Emmanuel Makron bilan ham gaplashgan. Suhbat chogʻida u Fransiya yetakchisiga Putin “hamma narsani olmoqchiligini aytdi”, degan.

“Oxirgi ikki hafta ichida Tramp Putinning oʻt ochishni toʻxtatishga rozi boʻlmayotgani va Rossiyaning Kiyev va boshqa shaharlarga hujumlarini kuchaytirayotganidan koʻproq xafa boʻldi”, deyiladi “Axios” xabarida.

Shu yilning 3-iyul kuni Trampning Oq uyga qaytganidan keyin Putin bilan oltinchi telefon muloqoti boʻlib oʻtdi. Bir soatcha davom etgan suhbatda Putin Rossiya Ukraina inqirozining asl sabablarini bartaraf etishdan voz kechmasligini taʼkidlagan.

Oq uy rahbari Ukraina masalasi boʻyicha muzokaralar natijalaridan norozi ekanligini, keyinroq esa ulardan juda hafsalasi pir boʻlganini qoʻshimcha qildi. U Ukrainadagi mojaroning hal etilishini istashini taʼkidladi, ammo bu sodir boʻlmasligi mumkinligini ham istisno etmadi. Kremlga koʻra, Putin AQSH yetakchisiga maxsus harbiy operatsiya diplomatik yoʻllar orqali oʻz maqsadlariga erishish mumkin boʻlmaguncha davom etishini aytgan.

AQSH Ukrainaga uzoq masofali raketalarni topshirishi mumkin

Tramp allaqachon AQSH “Patriot” zenit-raketa tizimlarini Ukrainaga berishini vaʼda qilgan va “bu ularga juda zarur”, degan. Ammo u Ukrainaga qancha tizim oʻtkazilishiga aniqlik kiritmadi. Shuningdek, AQSH yetakchisi Vashington Kiyevga “turli xil qurollar” yuborishini, ularning haqini Ukraina tomoni toʻliq toʻlashini aytdi.

“Axios”, shuningdek, Tramp bugun, 14-iyul kuni Ukrainaga hujum qurollari yetkazib berilishini eʼlon qilishni rejalashtirayotganini daʼvo qilmoqda. Ikki manbaning taʼkidlashicha, Vashington, ehtimol, Kiyevga Rossiya hududidagi, shu jumladan, Moskvadagi nishonlarga zarba bera oladigan uzoq masofali raketalarni topshirishga qaror qilgan. Biroq, ikkala manba ham AQSH rahbarining bu qarori yakuniy yoki qatʼiyligini bilmasligiga aniqlik kiritdi. Oʻz navbatida, Oq uy vaziyatga izoh berish soʻroviga javob bermagan.

“Reuters”ning yozishicha, Tramp oʻz vakolatlaridan ikkinchi prezidentlik muddati boshlanganidan beri birinchi marta Ukrainaga qurol joʻnatish uchun foydalanmoqda. Taʼkidlanishicha, avvalgi barcha yetkazib berishlar Jo Bayden boshchiligidagi AQSHning avvalgi maʼmuriyati tomonidan kelishilgan. Prezidentning milliy zaxiralarni qisqartirish huquqi davlat rahbariga favqulodda vaziyatlarda ittifoqchilarga yordam berish uchun qurol arsenalidan foydalanish imkonini beradi.