Фото: AP

“Axios” портали АҚШнинг Украинага ҳужум қуролларини топшириш режалари ҳақида хабар берди.

АҚШ президенти Дональд Трамп Украинага қурол етказиб беришни яна тикламоқда. Янги “Patriot” ҳаво мудофаа тизимларини топшириш аллақачон эълон қилинган эди. Энди Вашингтон Киевни ҳужум қуроллари билан ҳам таъминламоқчи.

Порталга кўра, Дональд Трампни бунга ундаган сабаблардан бири 3 июль куни Россия президенти Владимир Путин билан телефон орқали суҳбат бўлган. Айтилишича, Россия президенти “келгуси икки ой ичида Россия муҳим мавқега эга бўлган Украина вилоятларининг маъмурий чегараларигача янги ҳужум ҳаракатларини амалга оширишини аниқ айтган”. Ҳужумлар Украина вилоятларига ёки Россиянинг янги ҳудудларига амалга оширилиши аниқ эмас. Чунки АҚШ уларнинг Россияга қўшилишини тан олмайди.

Бир кундан кейин Дональд Трамп Франция президенти Эммануэль Макрон билан ҳам гаплашган. Суҳбат чоғида у Франция етакчисига Путин “ҳамма нарсани олмоқчилигини айтди”, деган.

“Охирги икки ҳафта ичида Трамп Путиннинг ўт очишни тўхтатишга рози бўлмаётгани ва Россиянинг Киев ва бошқа шаҳарларга ҳужумларини кучайтираётганидан кўпроқ хафа бўлди”, дейилади “Axios” хабарида.

Шу йилнинг 3 июль куни Трампнинг Оқ уйга қайтганидан кейин Путин билан олтинчи телефон мулоқоти бўлиб ўтди. Бир соатча давом этган суҳбатда Путин Россия Украина инқирозининг асл сабабларини бартараф этишдан воз кечмаслигини таъкидлаган.

Оқ уй раҳбари Украина масаласи бўйича музокаралар натижаларидан норози эканлигини, кейинроқ эса улардан жуда ҳафсаласи пир бўлганини қўшимча қилди. У Украинадаги можаронинг ҳал этилишини исташини таъкидлади, аммо бу содир бўлмаслиги мумкинлигини ҳам истисно этмади. Кремлга кўра, Путин АҚШ етакчисига махсус ҳарбий операция дипломатик йўллар орқали ўз мақсадларига эришиш мумкин бўлмагунча давом этишини айтган.

АҚШ Украинага узоқ масофали ракеталарни топшириши мумкин

Трамп аллақачон АҚШ “Patriot” зенит-ракета тизимларини Украинага беришини ваъда қилган ва “бу уларга жуда зарур”, деган. Аммо у Украинага қанча тизим ўтказилишига аниқлик киритмади. Шунингдек, АҚШ етакчиси Вашингтон Киевга “турли хил қуроллар” юборишини, уларнинг ҳақини Украина томони тўлиқ тўлашини айтди.

“Axios”, шунингдек, Трамп бугун, 14 июль куни Украинага ҳужум қуроллари етказиб берилишини эълон қилишни режалаштираётганини даъво қилмоқда. Икки манбанинг таъкидлашича, Вашингтон, эҳтимол, Киевга Россия ҳудудидаги, шу жумладан, Москвадаги нишонларга зарба бера оладиган узоқ масофали ракеталарни топширишга қарор қилган. Бироқ, иккала манба ҳам АҚШ раҳбарининг бу қарори якуний ёки қатъийлигини билмаслигига аниқлик киритди. Ўз навбатида, Оқ уй вазиятга изоҳ бериш сўровига жавоб бермаган.

“Reuters”нинг ёзишича, Трамп ўз ваколатларидан иккинчи президентлик муддати бошланганидан бери биринчи марта Украинага қурол жўнатиш учун фойдаланмоқда. Таъкидланишича, аввалги барча етказиб беришлар Жо Байден бошчилигидаги АҚШнинг аввалги маъмурияти томонидан келишилган. Президентнинг миллий захираларни қисқартириш ҳуқуқи давлат раҳбарига фавқулодда вазиятларда иттифоқчиларга ёрдам бериш учун қурол арсеналидан фойдаланиш имконини беради.