“Prokuratura, ichki ishlar, soliq rahbarlari yaxshilab eshitib olsin: sektor ishidan ozod qilish bu – eski davrga qaytib, aholi va tadbirkorlarga har qadamda toʻsiq, korrupsiyaga sharoit yaratish, degani emas”, — dedi davlatimiz rahbari.

Tumanda jinoyatchilikni jilovlashga hokim bosh boʻlib, barcha ishlarni muvofiqlashtirishi, uning bu boradagi oʻrni hech qayerga yoʻqolmasligi koʻrsatib oʻtildi.

Har haftada prokuror va ichki ishlar boshligʻi bilan hududdagi vaziyatni muhokama qilib borishi shart va zarurligi qayd etildi.

Bosh prokuratura, Ichki ishlar, DXX akademiyalari, Yuridik va Jamoat xavfsizligi universitetlariga jinoyatchilikni oldini olish boʻyicha hudud va sohalar biriktirilgan edi. Lekin ular kriminogen vaziyat murakkab mahallalarga olimlarini yubormayotgani, ushbu mahallalarni namunali qilishda jonbozlik koʻrsatmayotganiga eʼtiroz bildirildi.

Milliy kengash har chorakda ushbu oliygohlar rahbarlaridan ham hisobot soʻrab borishi kerakligi taʼkidlandi.

Umuman, Senat kamida 1 ta hududda jinoyatchilikni keskin qisqartirish boʻyicha, Qonunchilik platasi esa kamida 1 ta sohada korrupsiyaga barham berish boʻyicha takliflar berib borishi bu boradagi ishlar natijadorligini yanada oshirishiga ishonch bildirildi.

Bundan buyon, vazir va hokimlar lavozimga qoʻyilishidan oldin korrupsiyani oldini olish boʻyicha aniq rejasini parlament va mahalliy kengashlar oldida himoya qiladigan tizim joriy etish taklif qilindi.