Bugun, 8-aprel kuni Prezident matbuot kotibi Sherzod Asadov Oʻzbekiston jurnalistika va ommaviy kommunikatsiyalar universiteti tomonidan Navroʻz ayyomiga bagʻishlab tashkil etilgan tadbirda ishtirok etdi.

“Oʻzbekiston jurnalistika va ommaviy kommunikatsiyalar universitetining taklifiga binoan ushbu oliy taʼlim muassasasi tomonidan bahor bayrami – Navroʻzga bagʻishlab tashkil etilgan tadbirda mehmon boʻlganimdan mamnunman”, – deydi Sherzod Asadov.

Tadbir doirasida badiiy sahna chiqishlari, milliy taomlar, madaniy koʻrgazmalar, musiqiy dasturlar hamda qardosh mamlakatlar va yaqin hamkorlarimiz madaniyatiga bagʻishlangan ekspozitsiyalar bilan tanishildi hamda samimiy va bayramona muhitda ustoz-jurnalistlar, soha faxriylari, universitet jamoasi hamda talabalar bilan suhbatlashildi.

“Bunday tadbirlar tariximiz va boy madaniyatimizga boʻlgan hurmat, milliy anʼanalarimizni asrab-avaylash ruhini yuksaltirish bilan birga, avlodlar oʻrtasidagi rishtalarni mustahkamlash, tajribali jurnalistlar va sohaga kirib kelayotgan yoshlar uchun muloqot maydoni sifatida ham katta ahamiyatga ega”, – deb yozadi Prezident matbuot kotibi Sherzod Asadov.