Hukumat qarori (773-son, 24.12.2021-y.) bilan Pilla yetishtiruvchi jismoniy shaxslarga ular tomonidan yetishtirilgan pilla (hoʻl pilla) hosili uchun subsidiya ajratish tartibi toʻgʻrisidagi nizom tasdiqlandi.

Nizomga koʻra, 2022-yil 1-yanvardan 2025-yil 1-yanvargacha pillaning har kilogrammi uchun 5 ming soʻm subsidiya beriladi.

Ipakchilik va jun sanoatini rivojlantirish qoʻmitasi tomonidan har yili 20-iyulgacha respublikadagi pilla yetishtirish prognozlari ishlab chiqilib Moliya vazirligiga beriladi.

Moliya vazirligi prognoz asosida byudjetdan subsidiya ajratib Qoʻmitaga 1-fevralgacha oʻtkazib beradi.

Pillachilik klasterlari va tashkilotlari “Agropilla” MCHJlar bilan subsidiya oluvchilar roʻyxatini shakllantiradi va 25-fevralgacha Agentlikning hududiy boshqarmasiga beradi.

Hududiy boshqarma roʻyxatni umumlashtirib 1-martgacha Qoʻmitaga yuboradi.

Qoʻmita 10-aprelgacha pullarni subsidiya oluvchilarga berish uchun maxsus hisobvaraqlarga oʻtkazadi.

Pillachilik klasterlari va tashkilotlari subsidiya oluvchilarga pullarni kartaga yoki bankdagi hisobvaraqlariga oʻtkazib beradi.