Vengriyaga tashrifning ikkinchi kuni Oʻzbekiston delegatsiyasining Vengriya tadbirkorlari va kompaniyalari vakillari bilan amaliy uchrashuvi oʻtkazildi.

Uchrashuvda Vengriyaning 15 dan ortiq kompaniya va tashkilotlari vakillari ishtirok etdi.

Delegatsiya aʼzolari Oʻzbekistonda amalga oshirilayotgan keng koʻlamli islohotlar, iqtisodiy liberallashuv, sanoat modernizatsiyasi, xorijiy investitsiyalar uchun qulay muhit va davlat-xususiy sheriklik mexanizmlari haqida maʼlumot berdi. Shuningdek, ikki davlat oʻrtasidagi savdo-iqtisodiy, investitsiya, taʼlim va madaniy sohalardagi hamkorlik yoʻlga qoʻyilgani alohida taʼkidlandi.

Vengriya tadbirkorlari Oʻzbekiston bilan hamkorlikni kengaytirishga katta qiziqish bildirdi.

4iG raqamli yechimlar va telekommunikatsiya, H2O Konzorcium suv taʼminoti hamda ekologik texnologiyalar, Metrimed tibbiyot jihozlari va sogʻliqni saqlash, FANTASTIGO isteʼmol tovarlari, Limelog va Woodstock logistika hamda eksport-import sohalarida hamkorlik imkoniyatlari muhokama qilindi.

Tadbir doirasida Vengriyaning HEPA agentligining Oʻzbekiston bilan hamkorlik boʻyicha vakolatxonasi ochildi. Mazkur agentlik Oʻzbekiston va Vengriya oʻrtasidagi savdo-iqtisodiy, investitsiya aloqalarini rivojlantirishga xizmat qiladi.

Uchrashuv yakunida ikki tomonlama asosda maʼlumotlar almashuvini yoʻlga qoʻyish, loyiha takliflari tayyorlash va doimiy muloqot oʻrnatish boʻyicha kelishuvga erishdi.