Shu yilning 18-noyabr kuni oliy taʼlim sohasidagi nufuzli xalqaro agentlik – “QS Quacquarelli Symonds 2026” natijalari eʼlon qilindi. Bu haqida Oliy taʼlim, fan va innovatsiyalar vazirligi xabar berdi.

Unda aytilishicha, mazkur reyting dunyoning qariyb ikki mingta universitetini qamrab olgan boʻlib, unda Oʻzbekistonning 9 ta oliy taʼlim muassasasi, shu jumladan ularning uchtasi Top-1000 talik roʻyxatdan oʻrin olgan.

Ushbu roʻyxat orasida bir qator universitetlar oʻtgan yilgi koʻrsatkichlarini yaxshilagan boʻlsa, ayrimlari reytingga birinchi marotaba kiritilgan.

Oʻzbekiston OTMlarining reytingdagi oʻrinlari quyidagicha:

• “Toshkent irrigatsiya va qishloq xoʻjaligini mexanizatsiyalash muhandislari instituti” Milliy tadqiqot universiteti – 874-oʻrin;
• Toshkent davlat iqtisodiyot universiteti – 951 oʻrin;
• Oʻzbekiston Milliy universiteti – 970-oʻrin.

Shuningdek, yana 6 ta oliy taʼlim muassasasi, jumladan, Andijon davlat universiteti, Samarqand davlat universiteti, Toshkent davlat texnika universiteti, Toshkent davlat transport universiteti, Toshkent axborot texnologiyalari universiteti va Urganch davlat universiteti 1501+ guruhidan joy olgan.