AOKAda boʻlib oʻtgan brifingda Din ishlari boʻyicha qoʻmitasi axborot xizmati rahbari Ilhom Maʼrupov “Haj-2024” mavsumiga koʻrilayotgan tayyorgarlik haqida maʼlumot berdi.

Maʼlum boʻlishicha, 2024-yilda 15 mingta yurtdoshimiz Haj safariga kvotaga ega boʻlishdi. Saudiya Arabistoni Podshohligi tomonidan belgilangan tartibga muvofiq haj amallarini bajarish uchun ziyoratchida “Haj-2024” vizasi boʻlishi shart.

“Haj-2024” mavsumiga tayyorgarlik maqsadida, dastlabki ishchi guruh Saudiya Arabistoniga yetib borib, ayni paytda Makka va Madina shaharlaridagi mehmonxonalarda, shuningdek, Mino, Arafot, Muzdalifa manzillarida boʻlib, yurtdoshlarimiz uchun barcha sharoitlarni hozirlash boʻyicha tegishli chora-tadbirlarni amalga oshirmoqdalar.

Eslatib oʻtamiz, joriy yilning 23-maydan 7-iyun kuniga qadar respublikaning 10 ta hududiy xalqaro aeroporti: Toshkent, Namangan, Fargʻona, Qarshi, Termiz, Samarqand, Buxoro, Navoiy, Urganch, Nukus shaharlari orqali hojilarni Madina shahriga yuborish hamda 22-iyundan 12-iyulga qadar Jidda shahridan Oʻzbekistonga olib kelish ishlari amalga oshiriladi.