Toshkentda Markaziy Osiyo mamlakatlarining tarixiy sammiti yakunlandi.

Bugun Oʻzbekiston Prezidenti Shavkat Mirziyoyev raisligida, Ozarbayjon, Tojikiston, Turkmaniston, Qirgʻiziston va Qozogʻiston Prezidentlari ishtirokida oʻtgan Maslahat uchrashuvida davlat rahbarlari Ozarbayjon Respublikasini ushbu formatga toʻla huquqli ishtirokchi sifatida qoʻshilishi toʻgʻrisida qaror qabul qildilar.

Uchrashuvda soʻzga chiqqan ishtirokchi mamlakatlar yetakchilari mintaqaviy sheriklikni yanada mustahkamlash boʻyicha muhim tashabbuslarni ilgari surdilar. Yakunda koʻp tomonlama hujjatlar imzolandi.

Sammit doirasida 15-noyabr kuni davlatimiz rahbari Ozarbayjon Prezidenti Ilhom Aliyev, Qirgʻiziston Prezidenti Sadir Japarov va Tojikiston Prezidenti Emomali Rahmon bilan uchrashuvlar oʻtkazdi. Shu kuni Qozogʻiston Prezidenti Qasim-Jomart Toqayevning mamlakatimizga davlat tashrifining asosiy tadbirlari boʻlib oʻtdi.

Tadbir dasturidagi voqealar yakunlangach, “Toshkent-Humo” xalqaro aeroportida davlatimiz rahbari Qozogʻiston, Tojikiston, Qirgʻiziston va Ozarbayjon Prezidentlarini samimiy kuzatib qoʻydi. Ular oʻz yurtlariga joʻnab ketdilar.

Ertaga, 17-noyabr kuni Turkmaniston Prezidenti Serdar Berdimuhamedovning mamlakatimizga davlat tashrifining asosiy tadbirlari boʻlib oʻtadi.