“Manchester Siti” klubi rasmiy sayti hamda ijtimoiy tarmoqlardagi sahifalari braziliyalik himoyachi Vitor Reis jamoaga kelib qoʻshilganini eʼlon qildi.

19 yoshli futbolchi toʻrt yarim yillik shartnoma asosida “shaharliklar” tarkibiga oʻtdi. 2029-yilning yozigacha amal qiladigan shartnomani tuzish uchun “Man Siti” 35 million yevro toʻlaydi.

Reis bugunga qadar Braziliyaning “Palmeyras” jamoasi safida toʻp surgan. Futbolchi yangi jamoasida 22-raqamda toʻp suradi.

“Vitor Reis — dunyodagi eng umidli yosh himoyachilardan biri va biz uni jamoaga olib kelganimizdan xursandmiz”, — deydi klub sport direktori Chiki Begiristayn.

Eslatib oʻtamiz, “Manchester Siti” klubi hamyurtimiz Abduqodir Husanov transferini ham eʼlon qilgan edi.

Eʼtiborlisi shundaki, Abduqodir Husanov ham, Vitor Reis ham markaziy himoyachi sanaladi.

Muhim savol tugʻiladi: Abduqodir Husanov hamda Vitor Reis oʻz pozitsiyasi uchun raqobat olib boradimi yoki oʻzaro tandem hosil qiladimi? Bu endi vaqt masalasi.

Taxminlarga koʻra, Abduqodir Husanov hamda Vitor Reisni muxlislar bilan tanishtiruv taqdimoti 25-yanvar kuni APL doirasida boʻlib oʻtadigan “Chelsi” klubiga qarshi bahsdan oldin “Etihad” stadionida boʻlib oʻtadi.