Quva tumanidagi “Goʻzal” mahalla fuqarolar yigʻini besh yil davomida jinoyatchilik koʻp sodir etiladigan, “qizil” toifadagi ogʻir hudud sifatida qayd etilgan edi. Bu holatdan charchagan mahalla ahli tuman davlat va jamoat ishlarida katta tajribaga ega Ahror Qurbonovni MFY raisligiga sayladi. Yigirma beshtaga yaqin koʻp qavatli uylar joylashgan, odamlar tez-tez almashib turadigan bunday hududda vaziyatni izga solish oson emasdi. Ishsizlik, migratsiya bilan bogʻliq muammolar ham koʻp. Ammo yangi rais kecha-yu kunduzi tinim bilmadi. U profilaktika inspektori bilan hamkorlikda oilalar oʻrtasidagi kelishmovchiliklarni oʻrgandi. Nizolarni oʻz vaqtida joyida tinch yoʻli bilan hal qildi.

– Yangicha tizim asosida ishlash natijasida joriy yildan hududimiz “yashil” toifaga oʻtdi, — deydi rais A. Qurbonov. — Bugun 740 ta oilada istiqomat qiluvchi 3 100 nafardan ziyod aholi uchun “Xavfsiz mahalla” tamoyili amalga oshirilmoqda. Yaqin kunlarda davlat – xususiy sheriklik asosida MFY uchun zamonaviy bino qurilishi ham boshlanadi.

Fargʻona viloyatida yangilanishlar va oʻzgarishlar avj olgach, hududlarni rivojlantirish, aholi farovonligini taʼminlashga qaratilgan tashabbuslar “mahalla yettiligi” eʼtiboridan chetda qolmayapti. Oʻzaro hamjihatlikda olib borilayotgan ishlar samarasi oʻlaroq, viloyatda 60 ta MFY “qizil” toifadan “yashil”ga oʻtkazildi.

Prezidentimiz tomonidan joriy yil 3-yanvarda qabul qilingan “2025-yilda respublika mahallalarida xavfsiz muhit yaratish va huquqbuzarliklarning oldini olish samaradorligini oshirish chora-tadbirlari toʻgʻrisida”gi qaror ham muhim dasturilamal boʻlib xizmat qilmoqda. Qaror ijrosi doirasida Fargʻona viloyatida 6 ta ichki ishlar boʻlinmasi oʻrnida 20 ta zamonaviy huquq-tartibot maskanlari tashkil etildi. Shuningdek, 116 ta ogʻir va 12 ta murakkab toifadagi mahallalarga mahalliy hokimlik va huquqni muhofaza qiluvchi organlar rahbarlari biriktirildi.

– Qaror asosan “Ijtimoiy profilaktika” tizimiga qaratilgan, shu bois ogʻir ahvoldagi mahallalar va ijtimoiy yordamga muhtoj aholiga alohida eʼtibor berilmoqda, — deydi Fargʻona viloyati IIB boshqarmasi boshligʻi oʻrinbosari, podpolkovnik Yorqinjon Pirmatov. — 19 ta shahar va tumanda “Ijtimoiy profilaktika maskanlari” tashkil etildi. Bu maskanlar mutasaddi rahbarlarni aholiga yaqinlashtirib, mahalla va aholi oʻrtasida hamkorlikni mustahkamladi. Mahallalar kesimida “yoʻl xaritalari” ishlab chiqilib, payshanba kuni “Huquqbuzarliklar profilaktikasi kuni” etib belgilab qoʻyildi. Oxirgi uch oyda mahallalarning kirib-chiqish joylari, koʻchalar, savdo va maishiy xizmat maskanlariga 550 ga yaqin kameralar oʻrnatildi. Har bir mahallada xavfsiz koʻcha va xavfsiz yoʻlaklar barpo etildi.

— Bizning mahalla soʻnggi uch yil mobaynida “qizil” toifada edi, — deydi Fargʻona shahridagi “Maʼrifat” MFY raisi Dilxusha Mamadaliyeva. — Zamonaviy yondashuv asosida har bir koʻchada qoʻshimcha yoritgichlar, yoʻl belgilari va xavfsizlik uchun zarur “tashvish tugmalari” oʻrnatildi. Yoʻl belgilari qayta chizilib, xavfsiz yoʻlaklar barpo etildi. Hozir 2 mingdan ortiq oilada istiqomat qiluvchi 6,5 mingdan ziyod mahalladoshlarimiz xotirjam yashamoqda.

Soʻnggi yillarda Fargʻonaning bir qator “ogʻir” toifadagi mahallalari — “Bahor”, “Maʼrifat”, “Zuhro”, “Toshloq”, “Furqat”, “Rapqon”, “Yangizamon”, “Gʻalaba”, “Goʻzal”, “Sharq” kabi maskanlarda jinoyatchilik salmogʻi keskin kamaydi. Joriy yilda 116 ta ogʻir mahallalardan 84 tasi “qizil” toifadan chiqarildi, 1 015 ta MFYning 526 tasida esa birorta ham jinoyat sodir boʻlmadi. Bu “Otang – mahalla, onang – mahalla” degan hikmatning hozirgi kunda ham aholi hayotida amalga tatbiq etilayotganini koʻrsatadi.

Botir MADIYOROV

(«Xalq soʻzi»).