Қува туманидаги “Гўзал” маҳалла фуқаролар йиғини беш йил давомида жиноятчилик кўп содир этиладиган, “қизил” тоифадаги оғир ҳудуд сифатида қайд этилган эди. Бу ҳолатдан чарчаган маҳалла аҳли туман давлат ва жамоат ишларида катта тажрибага эга Аҳрор Қурбоновни МФЙ раислигига сайлади. Йигирма бештага яқин кўп қаватли уйлар жойлашган, одамлар тез-тез алмашиб турадиган бундай ҳудудда вазиятни изга солиш осон эмасди. Ишсизлик, миграция билан боғлиқ муаммолар ҳам кўп. Аммо янги раис кеча-ю кундузи тиним билмади. У профилактика инспектори билан ҳамкорликда оилалар ўртасидаги келишмовчиликларни ўрганди. Низоларни ўз вақтида жойида тинч йўли билан ҳал қилди.

– Янгича тизим асосида ишлаш натижасида жорий йилдан ҳудудимиз “яшил” тоифага ўтди, — дейди раис А. Қурбонов. — Бугун 740 та оилада истиқомат қилувчи 3 100 нафардан зиёд аҳоли учун “Хавфсиз маҳалла” тамойили амалга оширилмоқда. Яқин кунларда давлат – хусусий шериклик асосида МФЙ учун замонавий бино қурилиши ҳам бошланади.

Фарғона вилоятида янгиланишлар ва ўзгаришлар авж олгач, ҳудудларни ривожлантириш, аҳоли фаровонлигини таъминлашга қаратилган ташаббуслар “маҳалла еттилиги” эътиборидан четда қолмаяпти. Ўзаро ҳамжиҳатликда олиб борилаётган ишлар самараси ўлароқ, вилоятда 60 та МФЙ “қизил” тоифадан “яшил”га ўтказилди.

Президентимиз томонидан жорий йил 3 январда қабул қилинган “2025 йилда республика маҳаллаларида хавфсиз муҳит яратиш ва ҳуқуқбузарликларнинг олдини олиш самарадорлигини ошириш чора-тадбирлари тўғрисида”ги қарор ҳам муҳим дастуриламал бўлиб хизмат қилмоқда. Қарор ижроси доирасида Фарғона вилоятида 6 та ички ишлар бўлинмаси ўрнида 20 та замонавий ҳуқуқ-тартибот масканлари ташкил этилди. Шунингдек, 116 та оғир ва 12 та мураккаб тоифадаги маҳаллаларга маҳаллий ҳокимлик ва ҳуқуқни муҳофаза қилувчи органлар раҳбарлари бириктирилди.

– Қарор асосан “Ижтимоий профилактика” тизимига қаратилган, шу боис оғир аҳволдаги маҳаллалар ва ижтимоий ёрдамга муҳтож аҳолига алоҳида эътибор берилмоқда, — дейди Фарғона вилояти ИИБ бошқармаси бошлиғи ўринбосари, подполковник Ёрқинжон Пирматов. — 19 та шаҳар ва туманда “Ижтимоий профилактика масканлари” ташкил этилди. Бу масканлар мутасадди раҳбарларни аҳолига яқинлаштириб, маҳалла ва аҳоли ўртасида ҳамкорликни мустаҳкамлади. Маҳаллалар кесимида “йўл хариталари” ишлаб чиқилиб, пайшанба куни “Ҳуқуқбузарликлар профилактикаси куни” этиб белгилаб қўйилди. Охирги уч ойда маҳаллаларнинг кириб-чиқиш жойлари, кўчалар, савдо ва маиший хизмат масканларига 550 га яқин камералар ўрнатилди. Ҳар бир маҳаллада хавфсиз кўча ва хавфсиз йўлаклар барпо этилди.

— Бизнинг маҳалла сўнгги уч йил мобайнида “қизил” тоифада эди, — дейди Фарғона шаҳридаги “Маърифат” МФЙ раиси Дилхуша Мамадалиева. — Замонавий ёндашув асосида ҳар бир кўчада қўшимча ёритгичлар, йўл белгилари ва хавфсизлик учун зарур “ташвиш тугмалари” ўрнатилди. Йўл белгилари қайта чизилиб, хавфсиз йўлаклар барпо этилди. Ҳозир 2 мингдан ортиқ оилада истиқомат қилувчи 6,5 мингдан зиёд маҳалладошларимиз хотиржам яшамоқда.

Сўнгги йилларда Фарғонанинг бир қатор “оғир” тоифадаги маҳаллалари — “Баҳор”, “Маърифат”, “Зуҳро”, “Тошлоқ”, “Фурқат”, “Рапқон”, “Янгизамон”, “Ғалаба”, “Гўзал”, “Шарқ” каби масканларда жиноятчилик салмоғи кескин камайди. Жорий йилда 116 та оғир маҳаллалардан 84 таси “қизил” тоифадан чиқарилди, 1 015 та МФЙнинг 526 тасида эса бирорта ҳам жиноят содир бўлмади. Бу “Отанг – маҳалла, онанг – маҳалла” деган ҳикматнинг ҳозирги кунда ҳам аҳоли ҳаётида амалга татбиқ этилаётганини кўрсатади.

Ботир МАДИЁРОВ

(«Халқ сўзи»).