Xorijda tahsil olayotgan oʻzbekistonlik talabalar soni qariyb 86 ming nafarga yetdi. Bu borada mintaqada Qozogʻiston, dunyoda esa Xitoy yetakchilik qilmoqda.

Davlat statistika qoʻmitasi maʼlumotlariga koʻra, 2021/22-oʻquv yili boshiga respublikamizdagi oliy taʼlim muassasalarida tahsil olayotgan xorijlik talabalar soni 5,1 ming nafarni tashkil etgan.

2021-yilning 1-yanvar holatiga, YUNESKOning statistika instituti maʼlumotlariga koʻra, xorijda tahsil olayotgan Oʻzbekistonlik talabalar soni 85,9 ming nafarni tashkil etgan.

Xorijiy davlatlarda tahsil olayotgan Oʻzbekistonlik talabalar soni bir yil ichida qariyb 33 ming nafarga ortdi. Ushbu koʻrsatkich boʻyicha Qozogʻiston Respublikasi 90,3 ming nafar talaba bilan mintaqada yetakchilik qilmoqda.

Dunyo miqyosida Xitoy Xalq Respublikasi 1,1 mln. talabasi xorijda tahsil olishi bilan mutlaq yetakchilik qilmoqda.

Mintaqadagi ayrim davlatlar boʻyicha xorijda tahsil olayotgan talabalar soni:

— Qozogʻiston – 90,3 ming nafar

— Oʻzbekiston – 85,9 ming nafar

— Ukraina – 79,9 ming nafar

— Turkmaniston – 68,2 ming nafar

— Rossiya – 57,6 ming nafar

— Afgʻoniston – 31,9 ming nafar

— Tojikiston – 28 ming nafar

— Belarus R. – 24,5 ming nafar

— Qirgʻiz R. – 13,3 ming nafar.