Grenlandiyadagi besh partiya yetakchilari AQSH prezidenti Donald Trampning soʻzlariga munosabat sifatida qoʻshma bayonot bilan chiqib, orolga nisbatan mensimaslikka barham berishga chaqirishdi. Bu haqda TASS xabar berdi.

“Biz amerikalik boʻlishni istamaymiz, dat boʻlishni ham istamaymiz — biz grenlandiyalik boʻlishni istaymiz. Grenlandiya partiyalari yetakchilari sifatida yana bir bor taʼkidlaymizki, Qoʻshma Shtatlarning bizning yerimizga nisbatan mensimas munosabati toʻxtatilishini istaymiz”, — deyiladi bayonotda.

Bayonotga qoʻshilgan partiya yetakchilari quyidagilar:
— Yens-Frederik Nilsen (“Demokratlar”),
— Pele Bruberg (“Mayak”),
— Mute Egede (“Xalq jamoasi”),
— Aleka Xammond (“Oldinga”),
— Akkalu Yerimiassen (“Birdamlik”).

Ular Grenlandiya demokratik ekanini va AQSH, shuningdek boshqa gʻarb davlatlari bilan hamkorlikni davom ettirishni istashini qoʻshimcha qilishdi.

Avvalroq Donald Tramp AQSH Grenlandiyaga milliy xavfsizlik nuqtayi nazaridan muhtoj ekanini aytgan edi.

Oʻz navbatida, Daniya bosh vaziri Mette Frederiksen Grenlandiya qirollik tarkibida ekanini taʼkidlab, AQSHni tahdidli bayonotlarni toʻxtatishga chaqirdi. U Vashingtonning orolni oʻz nazoratiga olishida hech qanday maʼno yoʻqligini ham alohida urgʻuladi.