Tuproqqalʼa tumanida Fransiyaning “Voltalia” kompaniyasi tomonidan quvvati 100 megavattlik quyosh elektr stansiyasi barpo etilmoqda. Ushbu stansiyaga dastlabki quyosh paneli oʻrnatildi.

— Sarimoy qishlogʻi yaqinidagi 180 gektar maydonda qurilayotgan stansiyaga 200 ming donadan ziyod quyosh panellari oʻrnatish rejalashtirilgan, — deydi “Voltalia” kompaniyasining Oʻzbekistondagi vakili Kerole Pontais. — Qurilish davomida oʻndan ortiq davlatlardan mutaxassislar jalb qilinadi, 500 nafar mahalliy aholi ish bilan band boʻladi. Loyiha amalga oshishi natijasida 60 mingdan koʻp xonadonlar elektr energiyasi bilan kafolatli taʼminlanadi.

— Qurilish ishlari toʻrtta bosqichda olib boriladi, — deydi loyihaning qurilish menejeri Jonibek Ismatullayev. — Birinchi bosqichda quyosh panellari oʻrnatiladi. Hududda burgʻilash yoʻli bilan 33 mingdan ortiq qoziqlar joylashtirilib, betonlanadi. Ikkinchi bosqichda yuqori kuchlanishli nimstansiya quriladi. Uchinchi bosqichda esa ishlab chiqarilgan elektr energiyasini milliy elektr tarmoqlari nimstansiyasiga yetkazib beruvchi elektr tarmoqlari tortiladi.

Toʻrtinchi bosqichda milliy elektr tarmoqlari nimstansiyasida qoʻshimcha qurilish-montaj ishlari bajariladi. Barcha qurilish jarayonini joriy yil oxirigacha yakunlashni moʻljallayapmiz.

Yevropa tiklanish va taraqqiyot banki tomonidan moliyalashtirilgan ushbu loyiha orqali 76 mln. metr kub tabiiy gaz tejaladi, atmosferaga 106 ming tonna zararli moddalar chiqishining oldi olinadi, hudud aholisi ekologik toza, “yashil” energiya bilan taʼminlanadi.

Odilbek ODAMBOYEV

“Xalq soʻzi”