Tramp maʼmuriyati Rossiya bilan urushni Yevropa ishtirokisiz hal qilishga harakat qilayotgan bir paytda, Yevropa davlatlari rahbarlari Fransiyada Ukraina boʻyicha favqulodda sammit oʻtkazmoqda.

Trampning Putinga nisbatan pozitsiyasi va AQSH rasmiylarining Ukraina hamda NATO haqidagi bayonotlari Yevropada xavotir uygʻotgan. Koʻpchilik kelishuv Rossiyaga ustunlik beradi, deb hisoblamoqda.

Yakshanba kuni Ukraina Prezidenti Vladimir Zelenskiy AQSH va Rossiya oʻrtasida Ukraina boʻyicha qabul qilingan har qanday kelishuvni inkor etishini maʼlum qildi. Agar zarur boʻlsa, tinchlik bitimini amalga oshirish uchun ingliz qoʻshinlari Ukrainaga joylashtirilishi mumkin. Bu haqda Daily Telegraph gazetasi Buyuk Britaniya Bosh vaziri Kir Starmerning soʻzlariga tayanib xabar berdi.

Shuningdek, Fransiya prezidenti Emmanuel Makron yakshanba kuni Saudiya Arabistoni valiahd shahzodasi Muhammad bin Salmon bilan telefon orqali suhbatlashib, Rossiyaning Ukrainadagi urushi masalasini muhokama qilgan. U Yevropa Ukrainada tinchlikni mustahkamlash jarayonlarining markazida boʻlishi kerakligini taʼkidlagan.